[pukhto]
کله چې مې کتاب پلورځي ته نوي چاپ شوي کتابونه راوړل نو د يو ناول نوم ته مې تلوسه پيدا شوه چې (جنګلاوه) څه مانا؟ زما يې لوستو ته بيړه شوه، څنګه چې مې کتابخانې ته راوړ، لوستو ته يې کېناستم. په اوله کې کیسه ډېره خوندوره راته ښکاره نه شوه، خو کله چې له پنځوسم مخه واوښتم، ناول کې داسې پېښې راغلې چې زه يې ونيولم، کيسه جالبه شوه او تشويش مې شو چې مخکې به څه کېږي؟
يو مور او پلار چې د ناول اصلي کرکټرونه دي له کلونو انتظار وروسته د يو ماشوم پيدا کېدو لپاره څومره ستونزې ګوري؟ لوستونکی خواشينی کوي.
کريم نورې ډېرې لانجې هم په غاړه اخېستي وي، د ښار په ځمکه يې يو ښکرور مئين شوی وي او غواړي په هره لار چې وي دغه ځمکه ترې خپله کړي او د صرافۍ مارکېټ په کې جوړ کړي، بل خوا د کلي د ځوانانو په مرسته غواړي چې اربکيان وشړي، خو دغه کار ورته ډېر ګران تمامېږي.
د ناول له لوستو وروسته مې څو ځل وويل کاش چې لږ نور هم اوږد شوی وی.
[/pukhto]