[pukhto]

دا مې ستړی تخیل دی، ستا د سیوري په تلاش دی

دا له ورایه چې لیدی شي یو راهګیر په آئینه کې

چرته چې د حق آواز د خوریدو له پاره په فضا کې ځای نه شي پیدا کولی او کله چې د هر سړي غږ د ویرې او یا د مفاد پرست نرګسیت له کبله غلی شي، نو په داسې وخت کې فکر له ودې پاتې کیږي او د خیر د ذکر نه ډډه کول د خلکو د مزاج برخه ګرځي.

دغه مرض د خپل بشپړ مهیب شکل سره اوس په پښتونخوا کې خور دی او د هرې دروازې مخ ته ولاړ دی. دا بیله خبره ده چې وراسته نرګسیت او دروغجن احساسِ تحفظ د خاورې د ټیکه دارانو خولې ګنډلي دي. اوس داسې وخت دی چې د مذهب تشریح منتشره شوې ده، ملي اډاڼه کمزورې ده او د قومي سیاست علمبردار ګوندونه یواځې د پیسو د ګټلو مشینونه دي. هر چا خپل کاروبار دلته راوړی دی او د ددې سیمې د کم ظرفه دلالانو په توسط یې رنګارنګه بازار ګرم کړی دی. په داسې حال کې چې واعظ د حورو ذکر غیر سیاسي عمل ګڼي او سیاسي کاروباریان نرم لفظونه د محفوظ مستقبل ضمانت ګڼي نو سړی به څه د خپل ځان خوشبويي احساس کړي او یا به د خپلې کورنۍ خوشالي وویني.

د مهلکې چپتیا په دې دور کې د ملکنډ د سفر په دوران کې د محترم اکبر سیال صاحب په ځای کې زما ملاقات له داسې یو شاعر ادیب سره وشو چې وجود ئې د اخلاص او آواز ئې د امتیاز څښتن و. هغه مونږ ته عزت راکه او خپل کتاب (اور په چنارونو ۲۰۱۰ چاپ) یې راته ډالۍ که. د ښاغلي دیدار طاهر چې څومره زړه لوی و، همدومره یې د شاعرۍ د اصنافو کینوس فراخ دی او دا ځکه چې د هغه د مقصد د ترویج کار ګران دی. هغه نه د چا mirroring  کړی دی او نه یې د چا په تقلید کې د بیدارۍ د عمل عام ټکي استعمال کړي دي. هغه چې هرڅه ویلي دي نو دخپل ذات د کرب زیږنده دي او د هغه د مخصوص Trend عناصر.د هغه د رقیب تصور نړیوال دی او د مکمل کتاب د لوستو نه وروسته باقاعده د هغه بدیت په سړي واضح شي. د هغه شاعري د معروض portrait دی او شخصیت یې د سیاق figurine . که دیدار طاهر چا نه وي لیدلی نو په خپل کتاب کې یې موندلی شي. هغه په خپلو لفظونو کې خور دی د خپل ټول محبت او کردار سره.

ځکه خو هر وختې مو سر مات وي، په سرو وینو یو

مونږه د کاڼي د صنم سره یاري کړې ده

****

دا د امن په نامه په دې دنیا کې

ماته جوړې دي چې څومره مسئلې دي

د یارانو په محله کې چراغان دی

د رقیب په چم کې جوړې زلزلې دي

د دیدار طاهر ملاقات ماته نوې حوصله راکړه او زما په رګونو کې یې د مینې نوی احساس خور که. هر څوک چې د بیدارۍ د آواز اوریدونکي وي او د پښتانه خیر خواه وي نو د هغه شاعري دې ولولي چې د طلب په شدت کې یې له حِدت سره سره جدت هم راشي او د مخکې تګ له پاره یوه نوې ساه واخلي.

[/pukhto]