[pukhto]
دا مشاعره د سکون په لټون ملګرو نياز علي خاکسار، عبدالقدير ملنګ، عزت الله ځواب او احمد جمال جمال د لوی اختر په اتمه شپه د روداتو ولسوالۍ په حصارشاهي کې د نياز علي خاکسار په حجره کې د شپې دولس بجې پای ته رسولې.
بلا دې واخلمه، درځمه اشاره په کار ده
ستاسې د کور زمونږ کوڅې ته دروازه په کار ده
جمال
د جهادونو شوقيان شته دی چې يو بل ووژني
د نړيوالو يوه بله ننداره په کار ده
ځواب
ما ته د خلکو مخ کې مړې داسې مه راګوره
مونږ پښتانه يوو، زمونږ مينه کې پرده په کار ده
ملنګ
که چرته زه خپل روايات ژوندي ساتل غواړمه
بيا نو بېټک د ښار په کار نه دی، حجره په کار ده
خاکسار
د وخت حجاج سپينې جامې اغوستي مونږ غولوي
بيا د مروان ګټې ته کومه ډرامه په کار ده؟
جمال
زما ښوونځی او مدرسه دې دواړه خوا په خوا وي
مونږ ته کتاب په کار دی، موږ ته سيپاره په کار ده
ځواب
لسګونه نه، سلګونه نه، زرګونه نه غواړمه
د ملالۍ په شان يو پېغله پښتنه په کار ده
ملنګ
ډېرې وعدې اسلام اباد وکړې پوره يې نه کړې
زمونږه يوه وعده په کار ده، خو پوره په کار ده
خاکسار
چې ما ښه ځوان ښايي، زما نرګسيت وي په ځای
ائينه سازه ما ته داسې ائېنه په کار ده
جمال
چې نيمې ما وخوړې، نيمې مې جانان وخوړې
ملا د داسې روژو څومره کفاره په کار ده؟
ځواب
دوه ورځې ژوند دی ولې دا هم په جنګونو تېر کړم؟
دوه ورځې ژوند دی، ما ته دوه ورځې مزه په کار ده
ملنګ
د څوارلسم سپوږمۍ پوره ده، ځکه ډېر ورګورم
په تصور دا ستا د مخ یې تماشه په کار ده
خاکسار
بيا به مې ټوله شپه له زلفو سره لوبې کوې
تا ته همت په کار دی، تا ته اراده په کار ده
جمال
يوه به خپله کوې، دوه د غنمرنګو اوره
ځوابه ښکلو سره لږه ګوزاره په کار ده
ځواب
قدير ملنګ ومه، ملنګ يمه، ملنګ به يمه
زما کچکول باندې ليکلې ستا نامه په کار ده
ملنګ
جمال، ځواب دواړه راغواړم، ملنګ کلي کې دی
نيازعلي زړه مې ډېر خفه دی، يوه شپه په کار ده
خاکسار

[/pukhto]