[pukhto]
دا یوه غیر رسمي ناسته وه، وزیر نن د خپلو معینانو کوربه وو.
هسې خو دوی د خپلو کیسو کولو لپاره راټول شوي ول، په ضمن کې پدې هم بحث کېدلو چې څنګه حداقل پنځوس سلنه بودجه مصرف او ځانونه له استیضاح وژغوري.
نظرونه مختلف او حل لارې ډېرې وې. مالي او اداري معین صیب وویل:
د وزارت دېرش سلنه بودجه مو په ډېرې خوارۍ په هاغه او دغه مصرف کړې، د پاتې شل سلنه نور مصرف لپاره هم بنده حیران، خدای مهربان !
وزیر یې خبره تایید کړه ویې ویل:
دا خو ده، نا امېده کېږو به نه. تر هر څه لومړی خو ما او خپلو ځانونو ته د نویو موټرو د اخستلو بندوبست وکړئ. هغه د مرمۍ ضد والا واخلئ، دا اوسني له موده لویدلي دي.
د وزیر صیب بل معین وویل:
د دفترونو فرنېچرې او پردې مردې هم بدلول غواړي، بس دی یو کال یې وشو. او دا چې د کال اخر دی نو ټولو ولایتي ریاستونو ته د کارمندانو د کاري ظرفیت لوړولو په موخه د پنځلس ورځنیو سیمینارونو د جوړولو سپارښتنه وکړئ.
د سیمینار لپاره د یوه ښه هوټل کرایه کول، د ګډونوالو لپاره د ترانسپورت اسانتیا او د خوراک څښاک مسلې دې ټولې په پام کې ونیسي.
مالي معین د سر په خوځولو تایید کړه:
او زه فکر کوم چې دا زمونږ له لومړیتوبونو څخه دي چې په ترسره کولو سره یې کولی شو له شپېتو تر اویا سلنه بودجه په بریالیتوب سره مصرف کړو. خو پوښتنه زمونږ د زړو موټرو او د دفتر د فرنېچرو ده چې له هغې سره څه وکړو؟
وزیر چې تسپې اړولې په کراره وویل:
هغه زه اخلم، وراره به مې داوطلبۍ ته درولېږم. تاسو د لیلام کارونه شروع کړئ.

[/pukhto]