– مرکه پيلوو؟
– ولې نه، پوښتنې مو وکړئ ؟
– پر ښځو د ظلم په اړه معلومات را کړئ؟
– ښځه! زمونږ په وطن کې د غلام په څېر ژوند کوي او همدايې د پېړيو راهيسې برخليک دی،د مثال په توګه؛ که يو سړی ډېره لويه ګناه يا بد کار وکړي څوک به غږ ورته ونه کړي اوله درده به بيا ښځې ته کنځلې کوي.
ښځه که ډېره وړه ختا وکړي، يا وژل کېږي او يا د رنګارنګ وحشتونو ښکار کېږي، هر څه چې سړي وغواړي کوي يې.
– د کلي او ښار د ښځو تر منځ څه توپير دی؟
– دواړه يو شان حالت سره مخ دي، په کلي کې به پلار لور ښوونځي ته نه پرېږدي، رواجونو او د خلکو خبرو ته به ګوري، د مخ پټو دګواښونو وېره به وي، خو په ښار کې چې يو پلار لور مکتب ته پرېږدي، په لارو کې د سړيو د بد چلند له امله ترې زدکړې پاتې کېږي او ډېرې کمې تر پوهنتونه رسېږي.
– وبښئ ښاغلې که راته ووايئ، په لاروکې سړي ښځو ته ولې مزاحمت کوي؟
– ډېره ښه پوښتنه مو وکړه، که مونږ وګورو او ليدلي به مو هم وي، يو سړی به ناست وي د ښځو د ښار او کوڅو ته راوتو په اړه به د کفر او پښتونولۍ خبرې کوي،خو که همدا چېرته ځان ته ناست وي بيا به ښځه له پښو څخه معلوموي چې سپينه ده او که توره، بدرنګه ده او که ښايسته.
– دليل يې هم ووايئ؟
– دليل يې دا دی چې نجونو او هلکانو يو ځای تعليم نه دی کړی، که دوی يو ځای درس ويلی وای د دوی سترګي به مړې وی او همدا لامل دی چې زمونږ هېواد وروسته پاتې دی او په ښځو ظلم کېږي، که دوی هر يوی تعليم کړی وای اوس به دومره وحشت نه وی او هر چا به خپل حق پېژندلی…
– خبرې مو ډېري خوږې دي، خو وخت کم دی، که په اخره کې کوم څه ويل غواړئ؟
– مننه، بس دومره به د يوې ښځې په صفت ووايم،چې په لورګانو تعليم وکړئ، په ښځو ظلم مه کوئ، ښځو ته وخت ورکړئ، تاسې خو غږ نشئ اوچتولای، پرېږدئ چې مونږ يې اوچت کړو، ښځه او نر دواړه انسانان دي او يو ځای دې مبارزه وکړي.