[pukhto]
رښتيا هم کتابونه مې ډېر ولوستل، يو د بل نه خوندور دي، دا ځل داسې يو کتاب درپېژنم، چې په لوستلو يې ستاسې ژوند بدلېږي.
ژوند وکړئ!
موږ ټول ژوند کوو. څنګه بريا ته ځان ورسوو؟ څنګه له خوښيو ډک ژوند وکړو؟ د همدې لپاره هر يوکس دېته اړتيا لري، چې دا کتاب يو ځل خامخا ولولي. دا کتاب مهاتريارا ليکلى دى، چې په هندوستان کې تر ١٠٠٠٠٠ څخه زيات پلورل شوى دى.
پښتو ژبې ته يې د ژباړې هڅه تکړه ژباړن او ليکوال طارق نجيب کړې ده، په کال ٢٠١٦ م. د ١١٠٠ ټوکو په شمېر د مازيګر کتاب پلورځي له لوري چاپ شوى دى.
(ژوند وکړئ!) کتاب د وړو مقالو ټولګه ده، چې په مختلفو موضوعاتو ليکل شوې مقالې دي، په هره جمله کې يې ډېر ژور مفهوم پروت دى، چې د ژوند اړوند مسايل رانغاړي، هره پاڼه يې لوستونکو ته نوى فکر او نوې عقيده ورکوي، چې کولى شي د لوستونکو شخصي او مسلکي چال چلند او د مختلفو څيزونو په اړه يې فکر بدل کړي، ژوند يې غښتلى، سوکاله او په زړه پورې کړي او د ژوند د هرې ورځې مبارزې، په سمه توګه مديريت کړي.
د (ژوند وکړئ!) کتاب هر لوستونکى داسې فکر کوي، چې دا کتاب ما لپاره ليکل شوى دى او د خپلې هرې پوښتنې ځواب پکې پيدا کولى شي.
زه يې تاسې ته د کتاب پر شاته پښتۍ څو ليکل شوې کرښې را اخلم:
“برياليتوب په سترو شيانو کى دی؛ خوښي، په کوچنيو شيانو کې ده، تفکر په هيڅ کې دى،
خداى په هرڅه کې دى، بس همدا ژوند دى.”
[/pukhto]