[pukhto]

ماښام شو،  تورکی کور ته دننه شو. لوبو ستړی کړی و. د هغه له ننوتو  څو شېبې نه وې تېرې چې د ګاونډي لور يې راننوته.

مور يې له نغري راووته، لوګي جينۍ وټوخوله. د سبو بوی کور په سر اخيستی و.

لاس  يې ښځې ته اوږد کړ.

ـ دا واخله!

بېرته خپل کور ته په منډه شوه.

ښځه کوټې ته  لاړه، هلک شمعه بله کړې وه او په  زوړ توشک پړ مخ پروت  و.

ورغله.

ـ   دا وخوره.

هلک راجيګ شو. د مور لا س کې يې مڼې وې. يوه يې ده ته ورکړه. او خپله دروازې ته تکيه کړې کېناسته.

هغه مڼه له شکمنو سترګو تېره او لاس کې  تاوه راتاوه کړه.  و يې غورځوله.

ـ ماته هغه بله!

مور يې خپله ورخطا کړه.

ـ واخله زهر دې شه.

د تورکي شونډې بړوسې، سترګې مړې او تندی تريو شو.

ـ نه يې خورم.

مور يې ورپاڅېده، سر ته يې ودرېده.

ـ اوس به يې خورې.  

ماشوم ځان غونج کړ، مڼه يې زنګانه سره پرته وه،  لاس يې ور تېر کړ.  نيولو سره يې خوړينه مڼه کې ګوتې ننوتې.

[/pukhto]