[pukhto]
د فبروري په اتمه سهار لس بجې په مازيګر کتاب پلورځي کې نصرت ارمان د کتاب په بازار خبرې وکړې.
( د کتاب بازار نه دی خراب شوی، بلکې ښه شوی دی، هغه وخت چې زه ماشوم وم او دې زېرزمينۍ ته راکوز شوم نو په شمار څو کتابخانې وې، خو اوس ګورو چې ګردو خواو ته کتابخانې جوړې شوي دي او دا څرګندوي چې د کتاب بازار ښه روان دی.
د کتاب په موسمي بازار کې اول د ناولونو کتابونه ګرم خرڅ شول او په سلګونه ناولونه پښتو ته وژباړل شوو، چاپ شول او خلکو واخيستل، بيا د شعر او شاعرۍ د کتابونو ګرم بازار و، وروسته د ټپيزو د کتابونو ګرم بازار چې بېرته ژر سوړ هم شو، د ټپو او غورچاڼونو بازار خو تر اوسه ګرم دی.
د پوهنتون د استادانو د کتابونو شمېر چې ورځ په ورځ زياتيږي او يواځې يې مخونه او نومونه بدلېږي بې معياره دي او تش تود بازار ته چاپېږي چې خپرندويۍ او استادان يې سره ګټې ويشي او زور يې له محصلينو وباسي، خو هغوی اړ دي چې دغه کتابونه واخلي)
دا چې د کتاب بازار ولې خراب دی؟ او څنګه ښه کېدای شي؟ د ارمان د لېکچر دوهمه برخه وه، نوموړي څو لاملونه چې د کتاب بازار يې خراب کړی په ګوته کړل او همدارنګه يې هغه لارې هم وښودې چې په عملي کېدو سره به يې د کتاب بازار ښه او د لوست فرهنګ عامېدای شي.
ارمان وويل چې يواځې فېسبوک او ساېټونه د دې وړتيا نه لري چې د کتاب بازار خراب کړي، خو د پي ډي ايف کتابونو نشرېدل تاثير کولای شي، موږ ډېر کم شمېر لوستونکي لرو چې هغه هم په انټرنيټي مطالعه بوخت شول.

فېسبوک کې سمه مطالعه شونې نه ده، بلکې د وخت د مصرفولو وسيله ګرځېدلې او د اړيکو ارازانه وسيله هم ده.
ارمان د کتاب په نړۍ وال بازار هم لنډې خبرې وکړې او هيله يې وښوده چې موږ هم يوه ورځ هغسې د کتابونو بازار ولرو لکه د نړۍ په پرمختللو هېوادونو کې چې دی.
ورپسې مشاعره وشوه چې احمد جمال جمال، صادق الله صادق، عزت الله ځواب، هارون راعون، ندیم شېنواري، ذاکر الله احساس، زاهد افغان په کې شعرونه وويل او اکمل نيکبین، غیرت مل محمدزی او يار محمد پرديس ترنمونه وکړل
د يادونې وړ ده چې محمد عارف، محمد صابر ، نورالحق حداد، امتیاز نجیبي، نور عمر، ثناءالله ځواب، انعام الله انعام، سبحان الله برداشت، زاهد افغان، حزب الله شهباز ، عطاءالله ځواب او زه رحیم الله رومان هم د بنډار ګډونوال وو.
د راتلونکې ناستې لپاره یار محمد پردیس ژمنه وکړه چې په FM راډیو ګانو به غږېږي.
[/pukhto]