[pukhto]
رسنۍ د ټولنې په پرمختګ، د خلکو د ژوند په بدلولو او د هغوی په پوهولو کې ستر رول لري، چې هېڅوک ترې سترګې نه شي پټولی، هغه مهال چې په افغانستان کې ازادې رسنۍ نه وې، زمونږ ولس له نړۍ سره اړيکه نه شوه نيولی او په تپه تياره کې ؤ.
له بده مرغه اوس د هېواد ځينې رسنۍ د زورواکو، تنظيمي او جهادي ډلو، ټپلو په ولکه کې دي او لا هم د څېړنيز ژورنالېزم په مخ کې ډېر خنډونه شته.
مونږ رښتينې، ناپېيلې او خپلواکې ملي رسنۍ نه لرو يا د ګوتو په شمېر دي، چې هغه هم د نه امکاناتو له کبله په بازار کې سيالي نه شي کولای.
نړيوال يواځې هغه رسنيو ته فنډ ورکوي، چې د دوی موخې تعقيبوي، اعلانات او پروژې په اړيکو او جوړ جاړي پيدا کېږي او مونږ چې په فساد لړلی سازش نه دی کړی؛ نو سم مزل نه شو کولای!
د بې شمېره راډيوګانو او تلوېزونونو پر ځای بايد څو معياري او ملي رسنيز بنسټونه جوړ شوي وای، اوس زمونږ محلي رسنۍ خپل توليد نه لري، بي بي سي يا ازادۍ راډيو چې کوم خبر خپور کړي دوی پرې بيا شپه او ورځ شخوند وهي.
همدارنګه دلته هر وخت له رسنيو د غم، وير، وژنو، مـرګونو خبرونه خپرېږي، چې د خلکو پر ذهنونو او روان يې بده اغېزه کړې، اوس خلک د وحشت د خبر په اوريدو ټکان نه خوري؛ عاطفې، مينې او مهربانۍ سر خوړلی.
د رسنيو چلوونکي بايد خپل رسالت درک کړي؛ خوشالوونکو خبرونو پسې وګرځي، تفريحي او روزنيزې برنامې جوړې کړي، ژوند ته ارزښت ورکړي، نوښتګر اوسي او خپله ټولنه د پرديو له فرهنګي يرغل وساتي.
[/pukhto]