[pukhto]
د ماشومانو د جنسي ځورونې د مخنيوي لپاره دغه ټکي په پام کې ولرئ.
۱- خپلو وړو لورګانو ته خبرداری ورکړئ چې هېڅکله دې هم د بل چا د زنګون په سر نه کيني، حتی د خپل کاکا، ماما او نورو نږدې خپلوانو.
۲- د دوه کالو څخه د پورته ماشومانو په مخ کې هېڅ کله کالي مه بدلوئ، يا هغوی بل چېرته ولېږئ او يا هم تاسې کوم ګوښه ځای کې جامې بدلې کړئ.
۳- هېڅ چا ته اجازه مه ورکوئ چې ماشوم ته مو حتی په ټوکو کې د (مېړه مې) يا (مېرمنه مې) خطاب وکړي.
۴- کله چې ماشومان مو د لوبو لپاره د نورو ماشومانو سره بهر ته وځي، نو د لرې نه يې وڅارئ، چې څه رقم لوبې کوي؟ ځکه چې ځينې ماشومان يو بل ته د جنسي ځورونې سبب ګرځي.
۵- که چيري مو ماشوم د ځانګړي کس سره د ليدلو لېواله نه وي، هېڅکله يې هم مه اړباسئ چې ليدو ته يې ورشي او که ماشوم مو جبري د يو ځانګړي کس سره لېوالتيا پيدا کړي، نو د هغه کس اعمال هم تر څارنې لاندې ونيسئ.
۶- کله چې مو ماشوم ګوښه ګير شو، هڅه وکړئ، په تکراري پوښتنو، صبر او حوصلې يې لامل پيدا کړئ.
۷- کارتون فلم، مجله او هر هغه څيز چې تاسې يا بل چا ماشوم ته ډالۍ کړی وي، مخکې له دې چې د ماشوم لاس ته ورشي تاسې يې يوځل وګورئ او ځان يې د محتوی څخه خبر کړئ.
۸- په کيبل کې هغه خپرونې فعال کړئ چې د کورنيو لپاره خپرونې ولري او دوستان او خپلوانو ته مو هم چې ستاسو ماشوم ورکره تګ راتګ لري وواياست چې هغه خپرونې دې د ماشوم په وړاندې نه ګوري چې کورنيو لپاره يې کتل ښه نه دي.
۹- د درې کالو څخه پورته ماشومانو ته مو د بدن د ځانګړو برخو د پرېمنځلو طرز ور وښاياست او ځان باوري کړئ چې مينځل يې زده کړي او همدا راز ورته وواياست چې هېڅ څوک حق نه لري د دوی د بدن ځانګړي ځايونو سره لاس ووهي.
۱۰- د هغو شيانو او يا کسانو تور ليست چې فکر کوئ ماشوم ته مو ضرر رسوي وليکئ، دغه ليست کې کېدای شي بېلابېل ځايونه، اشخاص او حتی ستاسې نږدې خپلوان و اوسي.
۱۱- ماشومانو ته مو وروښاياست چې څومره مهمه ده ترڅو د بد اخلاقه کسانو سره راشه درشه ونه لري.
۱۲- که چيري ماشوم مو د چا نه شکايت وکړ ژر تر ژره د قضيې څېړنه وکړئ، ماشومانو ته مو ډاډ ورکړئ چې په هر حال کې ورڅخه دفاع کوئ.
دا په ياد ولرئ که نن ماشوم نه لرئ، سبا ته به د ماشوم خاوند شئ، خو بې غوري او دغه ټکو ته نه پاملرنه به بدې پايلې ولري او ټول عمر به مو ماشوم ځوروي.

[/pukhto]